الله يمسيكو بالخير يا مخاتير

ان شالله تكونوا مبسوطين ومفيش طوش حواليكو

بكون كتير مبسوط لما بكون في المقعد وتلاقيلك واحد اختيار بيفهم شويه بيسلخلك أمثال ورا أمثال
مرات بيكون نفسي يكون معي ورقه وقلم عشان أسجلهم

بتعرفوا خساره كتير تضيع هذه الامثال الفلسطينيه معاهم لما يموتوا

فإيش رايكو كل واحد بيعرف مثل فلسطيني يسلخهولنا هان ويا ريت يقول متى ممكن نولع فتيله المثل، يعني ايش المناسبه اللي ممكن نقولوا فيها..

خليني أبدا معاكوا بأكم من هالمثل

(من دقن عبيد افتللوا قيد)
هادا المثل معناه أنو ممكن تعمل لواحد مقلب أو تمنعوا انو يعمل شئ معين من خلال تصرفات تخليه يعملها بنفسو.. وهيك كأنك فتلت أو عملت حبل من دقن الزلمه تبعك وربطت ايديه بهذا الحبل

(قاللوا لبدلك قاللوا صحيلك)
هادا المثل بينقال لما يكون اتنين صاحيين لبعض وكل واحد صاحي لتصرفات التاني، التنين بدهم عارض ياخدهم، وكأنوا واحد بيفكر حالوا شاطر وبيقوللوا أنا بأراقبك وانت مش عارف راح التاني قاللوا شايفك يا فالح..

(باب بيجيك منو الريح سدوا واستريح)
يعني من وين بيجيك مشاكل حاول تنهي وتخلص منها وريح راسك

بعدين تحرف هذا المثل وصار
(باب بيجيك منو الريح يلعن ابو اللي ركبوا)
وكمان
(باب بيجيك منو الريح ولا عشره على الشجره) طبعا يقال في حالة كنت بتستهبل

(ماحدا بيقول عن زيتوا عكر)
يعني مفيش حدا ممكن يوصف الحاجات الخاصه له بانها قليله القيمه او غير جيده

(زيوان القريب ولا قمح الغريب)
الزيوان بذور اعشاب تكون في القمح مثلا، ويتم تصفيه القمح منها لانها غير جيده ولا تؤكل، أما القمح فهو معروف..
لذلك يقال هذا المثل في حال اعطاء الاولويه للاقارب في شتى المجالات..

(بخت الرمايم قايم)
الرمايم يعني الناس اللي ما بتسواش تعريفه، مأخوذه من الرمه وهي الحيوان الميت المتعفن
يقال هذا المثل في حالة كان حظ شخص بسواش تعريفه، كان حظوا حلو ومقندل

(الكلام إلك يا كنه واسمعي يا جاره)
في هذه الحاله أنت بتوصف واحد أنو بيحاول يحكيلك أو يحكي لغيرك كلام بطريقه غير مباشره

المنحوس منحوس لو علقوا على - - - - (راسه ) فانوس

وطبعا كلنا عارفينه لانو ما في واحد فلسطيني الا وبيعرف هالمتل وصاير معاه طول حياته


وفي امثال مساوية اله برضو تقريبا نفس المعنى
(اجت الحزينة تفرح ما لقتلهاش مطرح )
(قليل البخت بيلاقي العظم في الكرشة )
(يللي ماله حظ لا يتعب ولا يشقى )


ويعتيكم العافية

_______________________________

يسلموا ايديك يا خال

خودلك كمان واحد

(لو فيها كاز لضوت)
أو (لو فيها زيت لضوت)
يقال في الموضوع المنتهى بشكل غير جيد، ولا أمل في اصلاحه

هاي

أنا عندي مثل حلو كتير وبيوصف كتير مواقف

" إن كان لك عند الكلب حاجة... قلله يا ... سيدي "

معناها مبين .. ما أظن محتاجة شرح

_______________________________