رحلتنا إلى العريش بالصور .....

**حسون** · #1 15-09-2005, 11:43 AM

صبااااااااااح الخير يا جماعة .. كيفكو ..

ألف مبروك علينا التحرير

وإنها لثورة حتى النصر حتى النصر حتى الشيخ رضوان

بدي أقولكم يا جماعة القصة من طقطق لسلام عليكم .. من أول ما طقت الفكرة في مخنا لحد ما حطيت راسي أنام وما رحت على الشغل تاني يوم

صلولي على النبي...

زيدوا النبي صلاة ...

وحدوا الله ..

انتوا وراكوا حاجة

القصة كيف بدت روحتنا على العريش .. سؤال ببطح نفسه

وأنا نايم في أمان الله قبل يومين ليلة ما اشتغل المقعد .. كنت نايم بتريح من بعد ما تعبنا ماحنا بنزق في المقعد لحد ما عشقناه .. (يعني اللي يحب النبي يزق) ..المهم دخل عليا أخويا النص شيكل (طبعا كتير اتفاجئو انو اخويا طلع النص شيكل .. آه ديروا بالكم عليه .. وبالراحة على فناجين القهوة...)
المهم دخل عليا وأنا نايم بقولي الناس بتدخل مصر .. وكل الناس هناك .. طبعا أنا كل فكري بحلم .. ولسة مش مستوعب الوضع .. قلتله روح يهبل .. سكر الباب واطلع ..

هادة الكلام في الليل .. صحيت الصبح .. أصبحنا وأصبح الملك لله .. إلا وكل العالم بتحكي انه العريش .. ومصر .. والفتحة .. ودخلنا .. وجبنا ..
هوب.. هادة الموضوع جد .. وأنا كل فكري بحلم .. المهم .. فتحت هالمسنجر .. وشفت سامو على المسنجر .. فبقوله خبط لزق هيك .. تروح تتغدى سمك في العريش ..
قالي شو انجنيت .. قلتله بحكي رسمي .. طبعا احنا فش عنا تفكير.. قالي ماشي..
قلتله بخلص شغل على الـ 3 بتجهز حالك وبنضل فاكحين هنا ..
وحددنا مين ناخد معنا .. على طول سلختلي مكالمة على أبو خزاع .. ومكالمة على ميدو .. ومكالمة على كمان الساحر (غزاوي شرب قهوة وشرد) .. وأبو خزاع حكا مع أبو السعيد (هادة ما بتعرفوه.. ملهوش على النت) على أساس يوصلنا على رفح ..
اضرب اخلع .. الساعه 5 العصريات كنا راكبين سيارة أبو السعيد ..

وعالعريش رايحين .. غزازوة بالملايين

واحنا في السيارة طلعنا على طريق صلاح الدين اللي كان ممنوع أيام الاحتلال صوص يمشي فيه .. طبعا الطريق مكسر ..

مرينا على البريج ...

وبعد البريج وصلنا لمدينة دير البلح.. المشهورة بأشجار النخيل (زي ما أخدنا بالمدرسة ) زي ما انتوا شايفين بالصورة..

وهي الجسر اللي كان يوصل مستوطنة ابصر ايش في معبر ابصر مين أظن كوسوفيم .. وملاحظين كيف الزحمة والناس على الجسر .. والدنيا مولعة

وهي نقطة مراقبة تاعت مستوطنة اللي بنسميها (قولبة - جولبة) عشان مراقبة المنطقة كلها بعد ما خلعوا الشجر ..

وهدموا البيوت ...

كل هادة عشان الأمن .. وحماية المستوطنات

ومرينا عن المنطقة اللي بتفصل غزة عن الجنوب.. اللي معروفة بمنطقة أبو هولي أو مفترق المطاحن ..
واللي لما كانت تسكر هالطريق.. يعني بس تطلع دبابة توقف على الشارع .. كان الجنوب ينفصل عن غزة .. وما في دبانة بتقدر تعبر ..
وهي مقاتل فلسطيني طالع على الجسر فوق . رافع علم فلسطين مع الكلاشين .. وفرحان بالانسحاب

بس كيف هالصورة .. قلق (مش عارف كيف اجت معي .. )

وقوات الأمن الفلسطينية قدرت توصل المناطق هادي بعد ما كانوا ولا يحلموا يوصلوها

وفي الطريق لقينا سيارات شكلهم كاينين مشروع كفتة..

ووكالات الأخبار والأنباء والدنيا كلها كانت موجودة في الطريق ..
ولقينا وحدة هبلة قاعدة فوق سيارة وبتحكي بالمايكروفون مع ابصر مين وبتتهابل

ولو خربت السيارة معهم .. جايبين وراهم كارة حمار للزنقات

والشمس كانت عند الغروب .. ومنظر (الفسق الكويس) كان بجنن ..

الايد مش مخروقة ديروا بالكم .. بس مع الشمس والعدسة .. عاملين اسكلوب مقروط مع الهمبكة..

وبعد طول هالطريق .. وصلنا مدينة رفح.. ويا حبيبي على رفح ... غزة كلها هناك .. وسيارات .. ودنيا .. وأمة لا إله إلا الله هناك .. وقعدنا ساعة نستنا واحد كان أبو خزاع متصل فيه جايبه دليل معنا .. عشان يعرفنا على الطريق .. ولا طلع دليل ولا نيلة .. طلع تييه .. ولما دخلنا مصر.. قال أنا زيي زيكم .. امشوا ورا هالناس..

المهم .. وصلنا للخط الفاصل .. بين غرة ومصر .. واللي عملوا فيه الفتحة اللي دخلوا الناس منها ..

طبعا مبين فيها الفتحة اللي عاملينا واللي الناس كانت تفوت منها ..

وهي صورة مقربة للفتحة ..

وأخيرا دخلنا على الأراضي المصرية ..اللي أول مرة أدخلها أنا..
وهي صورة الجدار الفاصل من الجانب المصري..

الواحد ماشي ومزهول من كمية العالم والبني آدميين اللي ماشيين قدامنا ..

وطبعا مشينا مشي .. مشينا مشي.. لما اندبحنا.. بين الصبر وعلى الرمل .. والله لا يوريكوا .. يعني بدينا نحس بالخازوق من هادي اللحظة.. بس قلنا الموت مع الجماعة رحمة .. يعني شايفين الناس قديش قدامنا ..

وبعد ما مشينا .. وصلنا لرفح المصرية .. واللي فيها كانوا يركبوا للعريش..

واحنا من شطارتنا .. ومن فلاحتنا .. ومن نباهتنا .. ومن فصاحتنا .. ومن كل إشي.. ما رضينا نركب من هنا .. قلنا زحمة ومش حنلاقي سيارات .. تعالوا نركب من قدام
وامشي يا ولد .. امشي وأنا بمشي.. ويلا عدنا وصلنا .. واحنا كل فكرنا يعني كأنه بدنا نمشي من الساحة للمينا ..
حسينا ساعتها بالخازوق لما واحد من الناس اللي هناك قالنا انه الطريق هادي طولها بحدود 55 كم .. أنا طبعا بلمت والشباب اللي معي صابهم كساح .. ولين عظام .. وحالة شلش ..
بس أبو خزاع قعد يرفع في معنوياتنا .. يا شباب .. احنا طالعين من دورنا عشان نوصل العريش.. ولازم نوصلها .. وخليكم صامدين .. واحنا ما بنتراجع .. لما كمان شوية لو كان معي كلاشين لفضيت المشط ..

وصلنا في الطريق بعد ما مشينا بحدود 20كم مشي لمحطة بنزين .. وفش أمل نرجع تاني .. لقيت سيارة بكب .. اللي هية يعني تندر بس مفتوحة .. وغزيت على السواق.. طالع على العريش يا باشا... قالي عالعريش نفسيها .. قلتله آه على العريش .. قالي العريش نفسييها .. قلتله آه نفسيها .. قالي اطلع .. قلتله أنا بس معي 3 شباب .. (هوة مش عارف انه معي جيش.. ) قالي لأ بس انت.. قلتلها ماشي.. وسفرت للشباب ..
لقوني طالع في التندر .. وقفوا قدام السيارة .. ونطوا ورا .. وقف السواق بدهش يمشي.. قال سار تقل كتير.. قلنالو بناخد بعض .. مش مشكلة .. ومن هالكلام .. ومشي يسطا .. خلص..

المهم دحلت الحكاية .. والحمد لله مشي الوضع .. وركبنا أخيراً سيارة..

طبعا ورا راكبين مهو فش مكان قدام .. آخر بهدلة .. بس قعدنا نرفه عن حالنا شوية.. كان معنا عريس عرسه بعد أيام قعدنا نغنيله . وتلولحي يا داليا .. وكنت أعزب داير مجنون . . وابسطنا الشباب اللي كانوا مدايقين من وجودنا عشان ركبنا ودايقنا عليهم .. بس هلأ يعني انبسطوا وصاروا يقولولنا وين من زمان عنكم ...

قعدنا ساعة في الطريق وطول الطريق واحنا نضحك على حالنا .. قال يلا يا شباب عدنا وصلنا .. وشدو الهمة يلا مضلش كتير.. واذا في السيارة وساعة .. هادة كيف لو مشي.. كان بدنا 3 أسابيع بس نوصل ..

المهم بالآخر وصلنا العريش... ويا حبيبي على العريش ...

(شايفين السيارة اللي قدام هادي .. في زيها كنا راكبين ورا .. اتخيلوا منظر 20 شب راكبين روا .. كيف الوضع حيكون)

أنا شفت المنظر .. حسيت بقيمة غزة.. طبعا غزة كلها هناك .. يعني اللي ما شفته في غزة من 10 سنين شفته هناك ..

وصلنا طبعا مهلوكين .. وصلنا الساعة 8 هيك .. بدنا نشوفلنا مكان ناكل فيه ..
أول شي عملناه شربنا عصير قصب ..
وبعدها قعدنا ندور على مطعم سمك قال.. من الساعة 8 للساعة 11 .. نلفلف بس على المطاعم .. وكل مطعم نفوته يقولنا مفش أكل.. .. مفش مكان .. بدك 3 ساعات بس يوصلك الدور ..
لما فقدنا الأمل وصرنا بدنا بس أي حاجة ناكلها.. فول.. (طعمية) فلافل يعني منا قلبت مصري ..
لما بالآخر لقينا محل مكتوب عليه كشري.. دخلنا طلع قالب المحل كبدة بس كاتب كشري للتمويه ..
قالنا هادي كبدة اسكندراني.. احنا قلنا اسكندراني اسكندراني.. انشالله صعيدي .. بس هات ناكل .. طلبنا 16 سندويش .. و6 سبرايت ..

(الراجل داقق على ايده PLO .. ) قلتله زبط الكبدة وبزيادة فلفل .. احنا غزازوة يخووووو .. قالي انت قريت اللي على ايدي.. خلص اسكت .. أنا سكتت

استنينا نص ساعة لما عملنا السندويشات .. أكلنا .. وعبينا الطاسة .. وطلعنا .. طلع الحساب 40 جنيه ..

طلعنا ندور بعدها على مكان نصرف مصارينا فيه .. مش ملاقيين .. ولا اشي ضل في العريش
لا أكل ولا شرب.. ولا بضاعة ..
الأسعار ارتفعت الضعف.. وبرضو ما ضل بضاعة ..
المحلات خلصت البضاعة وسكرت .. والسوبرماركت برضو فضيت البضاعة منه ..
تتار .. جراااد .. اشي ما مر على العريش زييه ولا حيمر ..
بقولنا واحد تاع محل.. انا يمر عليا يوم في الشهر زي هيك .. وطول الشهر بديش أشتغل ..
واللي بقوله هوة طول الأيام كدة .. بقولي كده ايه يا بيه (قالي بيه ) دي ترب/تورب .. (يعني مقابر) وانتوا اللي احييتوها ..

وهي شوية مقاطع من منظر الناس في سوق العريش

جراااااااد .. هجووووووووووم .. وضع يعني تقول الحج .. حتى أكتر نتفة ..

احنا انصدمنا باللي صار .. والواحد ندم مليون مرة على هيك عملة .. وهلأ صارت الساعة 1 وبدنا نروح .. ساعة لما لقينا سيارة .. وبالآخر لقينا سيارة نص نقل.. من اللي بتقلوا فيها العفش .. طلعنا فيها.. عفش عفش.. بس المهم خلصني وخود عباتي ..
وصلنا رفح الساعة 4 .. إلا وابو السعيد لسة بستنانا هناك .. فاكرينه أبو السعيد السواق اللي أخدنا .. وصلنا للبيوت كل واحد على بيته .. ودخلت البيت الساعة 5 الفجر بالزبط

اللي اعرفناه بعد هيك .. انه في مناطق تانية غير السوق.. كل فكرنا انه العريش بس هادي المنطقة اللي كنا فيها .. بس طلع في مناطق سياحية .. زي شرم الشيخ .. مناطق اسمها بساطة .. وسما العريش .. وفي الكورنيش .. والبحر .. وفي سينمات .. ويعني مناطق الواحد بنبسط فيها .. فقررنا نروح كمان مرة ..

وهادي رحلتنا إلى شرم الشيخ .. معلش اتأخرت عليكم في تنزيلها بسبب التعب اللي تعبناه .. وتاني يوم ما رحت على الشغل .. والصور معلش كتيرة .. بس للتوضيع .. والجودة تاعت الصور مش ولا بد .. عشان من كاميرا الجوال...

وهلا هلا عمي .. صبولي قهوة انقطع نفسي وأنا بكتب ..

Abo 7arb · #2 15-09-2005, 11:51 AM

ههههههههههههههههههههههه
عاملين زي الاعلان الي بيجي على دريم
.
.
هو في ايه عند حماده
.
.
بس شكلك تعبان كتير بالموضوع بارم برم لما قلت يا عيني
ههههههههههههههههههههههه

a7mad · #3 15-09-2005, 11:52 AM

واااااااااااااااااااااااااااااااااااااااااااو ما احلى الصور كل هادي المناظر انا شفتها لانو انا كنت في العريش

مرسي كتير يا حسون عالصور

والحمد عالسلامة يا سيدي

تحياتي الك يا مختارنا وانا بقول ليش العريش كانت منورة اتريتو المختار كاين غاد

ابو سماعين · #4 15-09-2005, 11:53 AM

مبروووووووووووووووووووووووووكين ياشباب غزه الاشااوس على التحرير و انسحاااب اليهود اولاد الكلب من غزه
والصــور حلوين يامختارنا وانشالله تكون الرحله مونجكه وانبستطو فيها
والصور هاااي تعتبر من الصور الناادره ولازم تحتفظ وتتسمكر في مكااان امين وتحت ايدي امينه وفتحيه لانها انشالله حتكون ذكرى للأجيال القااادمه
وحمدالله ع السلامه يامختااارنا وكل الشباب اللي كانو معااك

وحبيبي ياكبيـــر

buffy · #5 15-09-2005, 11:53 AM

حاجة دمار والله قبل شوي اجيت منها بجددددددددددد
بنصح الكل يروح

ما تقلقووووووووو وما حد يسمع كلام التاني بيفوتو الكل بس ارشي لك شرطي الحدود بسيجارة بتفوووووت

الحق حالك

**maes** · #6 15-09-2005, 12:05 PM

يعطيك العافية حسون بس انا اسمعت في قصة وراء فتح الطريق بين غزة ومصر وهي انة بعد انسحاب اليهود واحد من اطفال غزة حاول يطلع على السلك الي بينكم وبين مصر فقتلوة المصرين وضحكوا عليكم بفتح الطريق على العريش هيك اسمعت انا ما بعرف

**حسون** · #7 15-09-2005, 12:14 PM

هلا يا عمي .. منورين كلكم واحد واحد بالدور ..
وألف سلامة للي راح واللي ما راح واللي بفكر يروح ..

بس يا ميس.. ما بعرف هالقصة اللي بتقولي عنها .. أنا سمعت فيها .. بس ما بعرف صحتها..
بس اللي بعرفه انها طلعنا على العريش

بس قبل شوية بقرا في الجريدة شارون باعت لمبارك رسالة بقوله لسة الاتفاق اللي بينا الحبر ما جف عن الورق وهيك تعملوا ومش قادر تمسك الحدود..
مبارك رد عليه قاله الاتفاق كان انكم تنسحبوا في 15/9 وانتوا انسحبتوا قبل الموعد المحدد .. واحنا لسة ما كنا جاهزين ...

Abo 7arb · #8 15-09-2005, 12:17 PM

كلام ميس سليم 100 %
المصريين قتلو فلسطيني
وانكرو خلال نشرات الاخبار
وفتح المعبر للناس بالشكل هادا مجرد تغطيه على الحدث الي صار

**maes** · #9 15-09-2005, 12:22 PM

علشان تعرفوا لازم انه انضحك عليكم قتلوا واحد من عندكم واهلوكم فتح الطريق وانتوا متل الهبل ما صدقتوا وانسيتوا الي صار عيب عليكم الي بتعملوا فيه والله انا عندي عادي لاني مو من غزة بس بدكم الصراحة مقهورة علشان انتوا دخلتوا العريش وانا لا

**حسون** · #10 15-09-2005, 12:34 PM

اقتباس:

وانتوا متل الهبل ما صدقتوا وانسيتوا الي صار عيب عليكم الي بتعملوا فيه

واحنا متل شو يا ميس ؟؟ شكلك ما جربتي العكاز بلعب على جنابك لسة ..

آه رحنا يا ميس متل الهبل نجري وطلعنا على العريش..
أقولك ليش....؟؟!
لأنه النا سنين ما شمينا نفسنا.. سنين عايشين في قفص لا بنطلع ولا بننزل ..
سنين الحياة هية هية .. والعيشة هية هية ..
الوجوه نفس الوجوه.. الناس نفس الناس..
العيشة في روتين.. وفي خبط وضرب وطخ ..

آه رحنا نجري..
نشوف مناطق جديدة
نشوف ناس جديدة
نشوف حياة جديدة..

مكفي اللي شفناه
مكفي الأيام اللي عشناها في الاحتلال ..

قد ما أقلك وأشرحلك مش حتتصوري اللي كنا فيه ..
لأنك لك بساطة ما جربتي العيشة في غزة ..

أدوات الموضوع
مشاهدة صفحة طباعة الموضوع أرسل هذا الموضوع إلى صديق
طرق مشاهدة الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	إللي كتب الموضوع	القسم	مشاركات	آخر مشاركة
رحنا على العريش	أبو الساهر	حبيبي يا حااااااج	7	15-04-2008 12:05 PM
العريس	leto	كان ياما كان	25	18-12-2007 10:22 AM
أويها (زفة العريس)	طايش وعايش	للرجال .. والرجال قليل	5	11-04-2007 12:53 PM
العريش قبل عام	من السكة وشرقا	صور يا مصوراتي .. وعلق يا معلقاتي	16	25-09-2006 10:29 PM
زفة العريس على الحمار	ابن النصيرات	صور يا مصوراتي .. وعلق يا معلقاتي	23	07-11-2005 10:43 AM

الذين يشاهدون محتوى الموضوع الآن : 1 ( الأعضاء 0 والزوار 1)